पुणे
संपादकीय
डॉ. भताने’ज छाया फाऊंडेशनतर्फे जिल्हा परिषदेतील अधिकारी-कर्मचाऱ्यांसाठी मोफत दंत तपासणी शिबीर संपन्न
डॉ. भताने’ज छाया फाऊंडेशनतर्फे जिल्हा परिषदेतील अधिकारी-कर्मचाऱ्यांसाठी मोफत दंत तपासणी शिबीर संपन्न
जालना : जालना जिल्हा परिषदेच्या मुख्य कार्यकारी अधिकारी मा. सौ. मिन्नू पी.एम. यांच्या पुढाकाराने डॉ. भताने’ज छाया फाऊंडेशन व छाया डेंटल क्लिनिक, जालना यांच्या संयुक्त विद्यमाने जिल्हा परिषद कार्यालयात अधिकारी व कर्मचारी वर्गासाठी मोफत दंत तपासणी व मार्गदर्शन शिबीर उत्साहात पार पडले.
या उपक्रमात डॉ. गोविंद भताने, डॉ. किरण अंभोरे व त्यांच्या तज्ज्ञ वैद्यकीय टीमने जिल्हा परिषदेतील अधिकारी आणि कर्मचाऱ्यांची दंत तपासणी करून मौल्यवान सल्ला दिला. शिबिरादरम्यान खालील विषयांवर सविस्तर माहिती देण्यात आली. रूट कॅनॉल ट्रीटमेंटच्या आधुनिक पद्धती, इंप्लांट व अत्याधुनिक दंत प्रत्यारोपण तंत्रज्ञान, दात स्वच्छता (स्केलिंग) व त्याचे महत्त्व, तंबाखू व गुटखा सेवनामुळे होणारे तोंडाचे दुष्परिणाम व सवय सोडवण्यासाठी मार्गदर्शन, दंत आरोग्य, तोंडाची स्वच्छता व दातांच्या देखभालीबाबत जनजागृती, ज्यांना पुढील उपचारांची आवश्यकता आहे, अशा कर्मचाऱ्यांसाठी फाऊंडेशनच्या वतीने योग्य वैद्यकीय सुविधा उपलब्ध करून देण्यात आल्या. मुख्य कार्यकारी अधिकारी मा. मिन्नू पी.एम. यांनी या उपक्रमाचे कौतुक करताना सांगितले की, सुदृढ दात म्हणजे सुदृढ आरोग्याचा पाया. अशा आरोग्यविषयक उपक्रमांमुळे कर्मचाऱ्यांमध्ये आरोग्याची जागरूकता वाढते आणि कार्यक्षमता सुधारते. या वेळी शिरीष बनसोडे (अति. मुख्य कार्यकारी अधिकारी), राजेंद्र तुबखले (उपमुख्य कार्यकारी अधिकारी), पठारे (प्रकल्प संचालक – DRDA), डॉ. प्रशांत चौधरी (उपायुक्त – पशुसंवर्धन विभाग) तसेच श्री. वैभव ढवळे उपस्थित होते. शिबिरात जिल्हा परिषदेतील अधिकारी व कर्मचारी मोठ्या संख्येने सहभागी झाले. फाऊंडेशनच्या पदाधिकाऱ्यांनी व दंतचिकित्सकांनी सर्वांच्या सहकार्याबद्दल मनःपूर्वक आभार मानले.
क्रिडा
अंकुशराव टोपे महाविद्यालयात चार भाषिक वक्तृत्व स्पर्धेचा दिमाखदार सोहळा!
अंकुशराव टोपे महाविद्यालयात चार भाषिक वक्तृत्व स्पर्धेचा दिमाखदार सोहळा!
जालना: अंकुशराव टोपे महाविद्यालयातील वातावरण शब्दांच्या रणसंग्रामाने भारून गेले होते. निमित्त होते कर्मयोगी अंकुशराव टोपे यांच्या जयंती सप्ताहाचे, त्याअंतर्गत मराठी, हिंदी, उर्दू आणि इंग्रजी अशा चार भाषांमध्ये भव्य वक्तृत्व स्पर्धेचे आयोजन करण्यात आले होते. विद्यार्थ्यांच्या विचारांना योग्य व्यासपीठ मिळावे आणि त्यांच्यातील भाषिक कौशल्ये व आत्मविश्वास वाढावा, हा या उपक्रमाचा केंद्रबिंदू होता. प्राचार्य डॉ. दादासाहेब गजहंस यांच्या कुशल नेतृत्वाखाली ही स्पर्धा अभूतपूर्व उत्साहात पार पडली.
पदवी आणि पदव्युत्तर स्तरावरील स्पर्धकांनी या स्पर्धेत सहभाग घेऊन आपल्या वक्तृत्वाची चमक दाखवली. ‘कर्मयोगी अंकुशराव टोपे यांचे शिक्षण आणि सहकार क्षेत्रातील योगदान’ या प्रेरणादायी विषयापासून ते ‘पर्यावरण रक्षणातील आपली जबाबदारी’ आणि ‘समाज माध्यमांचा समाजजीवनावरील परिणाम’ यासारख्या समकालीन व ज्वलंत विषयांवर विद्यार्थ्यांनी आपले सखोल विचार आणि तर्कशुद्ध मते अत्यंत प्रभावीपणे मांडली. त्यांचे उत्कृष्ट सादरीकरण आणि विषयावरील पकड उपस्थितांना विचारमंथन करण्यास लावणारी ठरली.
या चुरशीच्या स्पर्धेत सर्वोत्तम ठरलेल्या विद्यार्थ्यांचा गौरव करण्यात आला. कु. पानसरे पायल विनोद (बी.ए. तृतीय वर्ष) हिने आपल्या वाणीच्या जोरावर प्रथम क्रमांकाची मानकरी ठरली. तर शुभम एकनाथ शिंदे (एम. ए. प्रथम वर्ष) आणि पवन नारायण सांगळे (एम. कॉम. द्वितीय वर्ष) यांनी एकत्रितपणे द्वितीय क्रमांक पटकावला. कु. भक्ती घुमरे (बी.ए. द्वितीय वर्ष) आणि कु. अनुद खानम रफीक खान (बी.ए. प्रथम वर्ष) यांना तृतीय क्रमांक विभागून देण्यात आला. तसेच चिन्मय जोशी (बी सी. ए. प्रथम वर्ष) याला त्याच्या प्रभावी कामगिरीबद्दल उत्तेजनार्थ पारितोषिक देऊन गौरवण्यात आले.
या स्पर्धेच्या परीक्षणाची जबाबदारी डॉ. जाधव ए.आर., डॉ. ए.ए. अकोलकर आणि डॉ. मोहम्मद रफिक यांनी पार पाडली. कार्यक्रमाच्या अध्यक्षस्थानी असलेल्या प्राचार्य डॉ. दादासाहेब गजहंस यांनी विद्यार्थ्यांच्या वक्तृत्वकलेचे कौतुक केले आणि उपक्रमाच्या यशस्वीतेबद्दल समाधान व्यक्त केले. याप्रसंगी उपप्राचार्य डॉ. संजय पाटील,उपप्राचार्य प्रा.पांडुरंग खोजे, डॉ. पंडित रानमाळ, डॉ .अविनाश भालेराव, डॉ. शंकर तिकांडे, डॉ.संदीप सावंत, यांची विशेष उपस्थिती होती . कार्यक्रमाचे प्रास्ताविक डॉ. अन्सारी मसूद अख्तर यांनी केले, तर डॉ. डी. एस. नागवे यांनी सूत्रसंचालन केले. डॉ. आर. के. काळे यांनी उपस्थितांचे आभार मानले.